На денешен ден 1924 година во Горна Џумаја е убиен Арсениј Јовков македонски револуционер, киносценарист и публицист.
Роден е како син на Атанас Јовков кој долги години се бори против месните бегови, а негов вујко е писателот Војдан Чернодрински. Своето образование го завршува во гимназијата во Битола. Токму додека е ученик во битолската гимназија почнува да пишува поезија.
Во пресрет на Илинденското востание, во престрелка со Турците, загинал таткото на Арсениј. Сè уште средношколец, Арсениј се враќа во Дебарско и влегува во Македонската револуционерна организација. Во 1903 година учествува во Илинденското востание како секретар на војводата Тасе Христов. Се бори во Дебарца и Кара Осман, а по загинувањето на неговиот брат Нико Јовков, Арсениј станува војвода на неговата чета. По востанието емигрирал во Бугарија.
Покрај револуционерната дејност, Јовков е и првиот македонски филмски сценарист, според чие сценарио е снимен документарниот филм „Македонија во слики“ во 1923 година. Исто така автор е и на сценариото за играниот филм „Илинден“.
Јовков е убиен на 14 септември 1924 година во Горна Џумаја во екот на познатите септемвриски Горноџумајски атентати.
