На 4 септември 2025 година (четврток), со почеток во 20:00 часот, во хотел „Аполонија“- Гевгелија, Емилија Николовска ќе одржи солистички концерт, посветен на нејзиното матурирање во ДМБУЦ „Илија Николовски- Луј“ во Скопје. Овој концерт не само што ќе биде значаен за неа туку и за целата локална заедница, бидејќи ќе го одбележи важниот момент во рамки на музичкиот живот на Гевгелија кога прогласена за Град на културата 2025 и е дел од културните активности за манифестацијата.
Во концерната програмата ќе се најдат композиции како „Партита бр. 2 d-moll“ од Ј.С. Бах, со Алеманда и Куранта, „Синкопи“ од Ф. Крајзлер, „Пролет, I став“ од А. Вивалди, „И Валцерот продолжува“ од Е. Хопкинс и „Концерт за виолина и оркестар e-moll, оп. 64, I став“ од Ф. Менделсон. Придружба на пијано ќе ѝ обезбеди Емилија Кабранова Филипова.
Настанот е во организација на ООМУ „Васо Карајанов“- Гевгелија, училиштето каде Емилија ги започна своите први музички чекори.
Емилија Николовска, родена во 2005 година, е надежна и талентирана виолинистка која своето музичко образование го започнува на седумгодишна возраст во Основното музичко училиште „Васо Карајанов“- Гевгелија. Под водство на проф. Марија Спасовска, таа ја започнува својата патека со виолината, додека теоретските предмети ги изучува во класата на проф. Ѓорѓи Улишев. На десетгодишна возраст, Емилија учествува на Државниот натпревар за млади музичари, каде што освојува Трета награда по виолина и Прва награда по солфеж. Нејзиниот напредок продолжува и во 2017 година кога учествува на Меѓународниот фестивал за класична музика “ART IN – VELES” и повторно освојува Први награди на Државниот натпревар по солфеж. Во текот на 2018 и 2019 година, Емилија се здобива со високи Први награди на Меѓународниот фестивал „Полихимнија“ во Скопје, како и на Државниот натпревар по солфеж. Во истите години, таа учествува на Семинарот по виолина под раководство на проф. м-р Олег и Анна Кондратенко. Своето основно музичко образование го завршува во класата на проф. Соња Панова, како првенец на генерацијата во ООМУ „Васо Карајанов“ за учебната 2018/19 година. Средното музичко образование го продолжува во ДМБУЦ „Илија Николовски- Луј“ во Скопје, во класата на проф. Јелена Туфекчиевска. Во 2025 година, Емилија е примена во европскиот оркестар “European Spirit of Youth Orchestra” под раководство на италијанскиот маестро Игор Корети Курет. Оркестарот, составен од педесет талентирани млади музичари од Европа и Азија, по дваесетдневни интензивни подготовки во Словенија, одржа концерти во Словенија, Австрија и Италија.
Моментално, Емилија своето музичко образование го продолжува на Факултетот за музичка уметност во Скопје, во класата на проф. м-р Олег Кондратенко. Нејзините достигнувања и континуирано усовршување ја прават една од најсветлите млади таленти во македонската музичка сцена. Како млада виолинистка, таа свири повеќе музички жанрови и се претставува на гевгелиската публика секојпат во различни состави, оставајќи силен впечаток со своите сценски настапи и емоционална интерпретација. Нејзината посветеност и страст за музиката ја прават исклучителна уметница во развој, која со сигурност ќе продолжи да блеска во иднината.
Извор:gevgelija.gov.mk
