Јавното обвинителство поднесе обвинение против 43-годишен маж од Кавадарци, осомничен за убиство на својот помлад брат, злосторство што се случи кон крајот на јули во семејниот дом. Обвинетиот, кој се наоѓа во притвор, го признал делото веднаш по откривањето на телото, кое било пронајдено во шупа во дворот на куќата.
Според обвинението, трагедијата се случила на роденденот на жртвата, кога меѓу браќата избила жестока расправија поради имотни несогласувања. Обвинетиот верувал дека брат му сака да го преземе целиот имот, по што — поттикнат од гнев и омраза — со тесла му нанел смртоносни удари по главата. Прво го погодил со тапиот метален дел, а потоа, кога жртвата паднала, уште двапати го удрил, предизвикувајќи моментална смрт.
Потоа, како што наведува Обвинителството, убиецот си заминал, но следниот ден се вратил и телото го преместил во бањата, обидувајќи се да ги избрише трагите од злосторството. Во следните денови повеќепати се враќал, чистел крв, преместувал предмети и на крајот телото го закопал во шупата, покривајќи го со ровка земја, шперплоча и стари предмети.
Телото било откриено по пријава на нивната сестра, која забележала сомнителна дупка во шупата. На 5 август, таа прво го пријавила исчезнувањето на брат ѝ И.И., а неколку часа подоцна и сомнежот дека тој можеби е закопан во дворот. По интервенција на полицијата, на местото излегле јавен обвинител, форензичари и погребална служба, кои го пронашле телото.
Истрагата утврдила дека во периодот по убиството, обвинетиот повлекувал пари со банкарската картичка на жртвата, што дополнително ја потврдило користољубивата позадина на злосторството.
Јавниот обвинител со обвинението побара и продолжување на мерката притвор за обвинетиот, наведувајќи дека се работи за особено тешко и свирепо убиство, извршено со ладнокрвна пресметка и обид за прикривање на трагите.
