Денеска во Занаетчиски дом свечено се одбележа јубилејот 80 години од основањето на Јавна општинска установа Библиотека „Тане Георгиевски“- Куманово и завршна манифестација на Месецот на книгата. Пред присутните гости се обрати директорката на Библиотеката Марија Спасовска, која ја потенцираше благородната мисија на оваа установа и создавање на соодветен простор каде што книгата е достапна за сите. Гостите проследија презентација изработена од кумановските библиотекари, како вовед во установата некогаш и денес.
Дел од свеченото одбележување беше македонскиот современ автор Калина Малеска, добитничка на наградата Роман на годината за 2024 година според Фондацијата “Славко Јаневски”, за делото “Светот што го избрав”, која го промовираше своето најново литературно остварување.
Беа доделени дипломи и благодарници на најдобрите ученици, како и на сите учесници од општинските основни и средни училишта на литературен и ликовен натпревар и Млади библиотекари, по повод Месецот на книгата, со цел да продолжат да се надградуваат.
Беше поставена изложба на наградените творби, на книги кои имаат посебна вредност за Библиотеката и првиот број на локалниот весник „Наш весник“, кој е во фаза на дигитализација. Уметничките дела на талентираните ученици кои твореа на платно, ќе ги красат просториите на “Тане Георгиевски”.
Во рамките на пригодната културно – уметничка програма, настапија ученици од ООУ „Кочо Рацин“ со драмска изведба од делото „Евгениј Онегин“ на Пушкин и ученици од УОМО „Панче Пешев“.
На свеченоста присуствуваа претседателка и членови на Совет на Општината и претставници на општинска администрација.
