Албанската Влада денеска донесе одлука за спроведување на нова програма за поддршка на домувањето на социјално ранливи категории, преку доделување бескаматни кредити субвенционирани од државниот буџет. Програмата, според министерот за економија, култура и иновации Бленди Гонџа, е насочена кон граѓани во особено чувствителна положба.
„Иницијативата обезбедува директна финансиска помош на семејствата на службеници кои го загубиле животот при вршење на должноста, како и на децата кои се под државна грижа“, изјави Гонџа на прес-конференција.
Покрај овие групи, програмата ги опфаќа и станарите кои живеат во поранешни приватни имоти, а централна новина е доделувањето на неповратен грант од 20% од вкупната цена на домот за секој апликант што ги исполнува критериумите.
Заинтересираните граѓани можат да аплицираат онлајн преку националниот портал, избирајќи ја услугата „Апликација за станбен кредит со 0% камата – Национална агенција за домување“. Апликантите ќе треба да го пополнат формуларот и да прикачат потребни документи, без потреба од претходна покана од Министерството. Рок за аплицирање нема – пристапот е отворен и континуиран.
Оваа нова програма се надоврзува на веќе постоечкиот систем на државни субвенции, со кој втора година по ред се доделуваат бескаматни кредити за лекари, полицајци и припадници на армијата – по 300 кредити годишно за секоја категорија. Новата шема претставува дополнителен чекор кон проширување на опфатот и обезбедување пристојно домување за поширок круг на граѓани.
