Албанскиот премиер Еди Рама изрази уверување дека Русија нема да нападне ниту една друга европска земја, во време кога стравовите од ескалација на конфликтот во Украина растат низ Европа. Во интервју за Ал Џазира, Рама истакна дека е неопходно Европската унија да има конкретен план за мир во Украина, особено во светло на напорите на САД за завршување на војната.
На конференцијата во Берлин, Рама рече дека би било “целосно глупаво” за која било земја да нападне членки на ЕУ или НАТО. “Русија нема да ја нападне Албанија и Русија нема да нападне ниту една друга европска земја,” изјави тој. Според него, НАТО е подготвен за секоја агресија и нема причина за страв, бидејќи е најсилната војска во светот.
Рама, кој е лидер на централно-левата Социјалистичка партија, нагласи дека 23 од 27 членки на ЕУ се членки на НАТО, а Албанија е дел од НАТО и е кандидат за членство во ЕУ од 2014 година. Тој истакна дека Русија постојано провоцира земјите на границата со неа, што создава дополнителни тензиции во регионот.
Во последните месеци, неколку европски земји, вклучувајќи ги Полска, Финска и Романија, ја обвинија Русија за наводни инциденти со дронови. Напнатоста се зголеми кога НАТО соопшти дека пресретнал три руски авиони, што Москва го отфрли како лажни обвинувања.
Рама, кој отворено ја критикуваше Русија за нејзината инвазија на Украина, истакна дека недостатокот на план за мир од страна на ЕУ изгледа “многу чудно”. Тој предложи дека ЕУ треба да развие сопствена дипломатија за да промовира визија за мир и да најде начин за преговори со Русија.
И покрај стравовите од ескалација на конфликтот, Рама изјави дека Албанија не чувствува притисок од руските активности, бидејќи нема симпатии за Русија. Тој додаде дека земјите од Источна Европа, кои граничат со Русија, се на висока безбедносна готовност.
На крајот, Рама изрази оптимизам за иднината на Албанија во ЕУ, нагласувајќи дека напредокот во преговорите за членство е забележителен, особено по почетокот на војната во Украина.
