Вашингтон, 4 февруари 2025 (МИА) – Американецот Винсент Лемарк Бурел е осуден на 475 години затвор за организирање борби со кучиња, што е најдолгата евидентирана казна некогаш изречена за злосторство за суровост кон животните, потврдија обвинителите.
Судијата на Врховниот суд во јужната американска држава Џорџија, Дин Ц. Бучи го осуди Бурел (57) по 93 точки од обвинението за борби со кучиња и десет точки за суровост кон животните, објави Ен-Би-Си Њуз.
Бурел ги негираше обвинувањата.
Локалните власти објавија дека 107 кучиња биле спасени од имотот на Бурел во 2022 година.
Џесика К. Рок, државен обвинител за злосторства врз животни и специјален помошник јавен обвинител во Џорџија, вчера изјави за Ен-Би-Си Њуз дека ова е „најдолгата позната казна за борби со кучиња“.
Истрагата започна во 2022 година кога доставувачот забележа неколку кучиња оковани со тешки каишки на имот во Далас, Џорџија, околу 30 милји западно од главниот град на државата Атланта.
Загрижен за доброто на кучињата, работникот ја пријавил ситуацијата кај властите, што поттикнало истрага.
Локалната полиција потоа го пребарала имотот и пронашла 107 кучиња кои покажуваат знаци на злоупотреба, вклучувајќи неухранетост и недостаток на храна, вода и засолниште.
Многумина беа врзани со тешки синџири за самосечење, метод познат за зголемување на агресијата.
Бурел беше уапсен под обвинение за организирање борби со кучиња и суровост кон животните.
Ветеринарот кој ги прегледал кучињата открил дека на некои им недостасуваат заби и ги идентификувал лузните со кои се здобиле во борбите, соопштија обвинителите.
Округот ги заплени кучињата по федерален налог, а подоцна тие беа ставени во прифатилиште на непрофитна група за заштита на животните.
Од Марија Спасовска /МИА
