Градоначалничката на Скопје, Данела Арсовска, ја оцени пресудата на Основниот кривичен суд во Скопје, со која Сулејман Љамалари е осуден на две години затвор за грубо насилство, како „системска победа за жртвите на насилство“. Арсовска изрази силно задоволство од одлуката на судот, истакнувајќи дека ова е значаен момент за сите жени и мајки во општеството.
„Ова е системска победа за жртвите на насилство, за секоја жена и мајка, за напад кој претставуваше и атак врз институцијата градоначалник. Насилникот не покажа ни трошка каење за стореното, со својот однос континуирано се исмеваше со судот и јавноста“, напиша Арсовска на својот Фејсбук профил. Таа додаде дека Љамалари дури се обидел да ја претстави жртвата како напаѓач, додека самиот, иако е насилник, се обидел да се прикаже како жртва на напад од страна на жена.
Судот го прогласи Љамалари за виновен за физички и вербален напад, нанесување телесни повреди и упатување сериозни закани, изрекувајќи му казна затвор во траење од две години. Исто така, судот одлучи да му се продолжи мерката притвор до правосилноста на пресудата, но не подолго од 60 дена. Случајот се однесува на инцидентот од 11 јули 2025 година, кога Арсовска била на терен со овластени службени лица по пријава за бесправна градба. Според обвинението, Љамалари пристигнал со електричен тротинет и ја нападнал градоначалничката, нанесувајќи ѝ телесни повреди и упатувајќи сериозни закани.
