Вашингтон, 15 јануари 2025 (МИА) – Поротата во Вашингтон во вторникот му наложи на „Баер“ да плати 100 милиони долари на четворица луѓе кои велат дека се разболеле од токсични хемикалии познати како ПХБ во училиште во Сиетл, но утврди дека компанијата не е одговорна за повредите што ги навеле 11 други лица.
Пресудата, која уследи по двомесечно судење, е последна во серијата тужби против компанијата поради наводно загадување во едукативниот центар Скај Вали во Монро, Вашингтон.
Повеќе од 200 ученици, вработени и родители изјавиле дека добиле рак, болести на тироидната жлезда, невролошки повреди и други здравствени проблеми поради истекување на полихлорирани бифенили (ПХБ) коинистекувале од светлосните тела на училиштето. Хемикалиите се произведени од „Монсанто“, кој „Баер“ го купи во 2018 година.
„Монсанто“ соопшти дека ќе поднесе правна постапка по судењето и, доколку е потребно, ќе поднесе жалба за укинување на пресудата или намалување на „прекумерната“ отштета доделена на четворицата тужители.
Доказите на судењето покажаа ниски до непостоечки нивоа на ПХБ, што не можеше да ги предизвика наводните здравствени ефекти, наведе „Монсанто“.
Поротата заклучи дека „Монсанто“ намерно сокрил информации за ПХБ и доделил 25 милиони долари за компензација и 75 милиони долари за казнена отштета.
Државниот апелациски суд се согласи со „Баер“ дека судот погрешно го применил законот во Мисури, каде што е седиштето на „Монсанто“, дозволувајќи да се покренат тужби неколку децении откако компанијата престана да произведува ПХБ во 1977 година.
Компанијата тврдеше дека треба да се применува законот во Вашингтон, што би ги блокирало тужбите бидејќи тие биле поднесени предоцна.
Во август, пресудата од 857 милиони долари беше намалена на 438 милиони долари, откако судијата утврди дека вклучува прекумерна казнена штета.
„Баер“ го купи „Монсанто“ за 63 милијарди долари во 2018 година. Оттогаш, тужбите за ПХБ, сериозно влијаеле на акциите на компанијата.
ПХБ некогаш биле широко користени за изолација на електрична опрема, а се користеле и во производи како хартија за фотокопирање, подни облоги и бои. Американската влада ги забрани во 1979 година, откако беа поврзани со рак и други здравствени проблеми. „Монсанто“ произведуваше ПХБ од 1935 до 1977 година.
Од Пандорка Арсовска-Гацова Извор МИА
