Народниот правобранител објави отворање на бесплатна телефонска линија за граѓаните кои сакаат да пријават евентуални неправилности на избирачките места. Оваа иницијатива доаѓа пред првиот круг од Локалните избори, кои се закажани за утре. Граѓаните кои ќе забележат неправилности или попречувања при остварувањето на своето право на глас можат да се јават на бесплатниот број 0800-54321, достапен од 07:00 до 19:00 часот.
Покрај телефонската поддршка, граѓаните ќе можат да поднесат пријави и лично во седумте канцеларии на Народниот правобранител, кои се наоѓаат во Скопје, Битола, Кичево, Куманово, Струмица, Тетово и Штип. Оваа мерка е дел од напорите на институцијата да се осигура дека правото на глас, кое е уставно загарантирано, ќе биде целосно заштитено.
Народниот правобранител нагласува дека надлежните органи имаат обврска да обезбедат слободно и тајно гласање. „Избирачкото право е уставно загарантирано како еднакво, општо и непосредно, и се остварува на слободни избори со тајно гласање. Никој не смее да биде повикан на одговорност поради остварување на ова право, поради што повредата на слободата на определување на избирачите, како и други повреди на избирачкото право, се казниви дела“, се вели во соопштението од Народниот правобранител.
