Германскиот автомобилски гигант BMW започна глобална акција за повлекување на 37.430 возила поради технички проблем кој би можел да предизвика пожар или дефект на моторот. Засегнати се одредени модели на Серија 3, 4, 5, X3 и X5, произведени во периодот меѓу септември 2024 и февруари 2025 година.
Како што пренесува Fenix Magazin, проблемот се наоѓа во приклучокот на старт-генераторот на батеријата во 48-волтниот електричен систем. Доколку на спојот се создаде преголем отпор, контактите може да се прегреат, што носи ризик од пожар или неочекуван прекин на работата на моторот.
Во Германија, повикани се 710 сопственици на засегнати возила. Посебно внимание се посветува на моделот X5 во долгата верзија, која е наменета исклучиво за кинескиот пазар.
BMW ќе ги извести сопствениците преку германската Федерална управа за моторни возила (KBA), а инспекцијата и евентуалната замена на приклучокот, плус кабелот или целиот старт-генератор ќе се извршат бесплатно во овластените сервиси. Истата процедура ќе се следи и во другите земји.
Сопствениците се советуваат да ја проверат состојбата на нивните возила и да закажат термин во најблискиот сервис доколку нивниот модел е опфатен со повлекувањето.
