Белград, 13 декември 2024 (МИА) – Исполнувањето на поставените услови е клучно за успешен пристап на сите земји кандидати во Европската унија (ЕУ), соопшти бугарската Амбасада во Белград во одговорот до ТВ Н1 во врска со средбата на амбасадорите на земјите членки на ЕУ на која не беше даден договор да се даде Србија зелено светло за отворање на Кластерот 3 во преговорите со ЕУ, пренесе Бета.
Бугарската амбасада соопшти дека земјата „доследно ја поддржува европската интеграција на земјите од Западен Балкан во ЕУ заснована на заслуги“.
„Бугарија конструктивно учествува во дискусиите во рамките на Советот на ЕУ за политиката на проширување и бугарското Министерство за надворешни работи не смета дека е соодветно да коментира за прашање што во моментов е предмет на внатрешна дебата во подготвителните тела на Советот на ЕУ“.
Тоа беше одговорот на Амбасадата на прашањата испратени од медиумот за неодамнешната средба на амбасадорите на земјите-членки на ЕУ, на која тие не се согласија да и дадат зелено светло на Србија за отворање на Кластерот 3, што се однесува на конкурентноста и инклузивниот раст. Прашањето беше дали се точни информациите дека Бугарија е против, како и кои се причините за ставот на Бугарија за отворањето на Кластерот 3 во преговорите на Србија со ЕУ, пренесе Бета.
Медиумите, а потоа и српските власти, пред една недела објавија дека осум земји од ЕУ се против давање согласност за отворање на Кластерот 3 со Србија. Тогаш беше наведено дека против тоа се осум земји – трите балтички земји Естонија, Латвија и Литванија, потоа Шведска, Финска, Холандија, Хрватска и Бугарија.
Од Златко Шумковски Извор МИА
