Прага, 24 март 2025 (МИА) – Чешка треба конечно да престане да увезува руска нафта преку нафтоводот „Дружба“, изјави денеска министерот за индустрија, Лукаш Влечек.
Во интервју за државната телевизија ČT, Влечек нагласи дека конечната одлука е во рацете на рафинеријата „Орлен Унипетрол“, која од 2005 година е во полска сопственост, пренесува ДПА.
Тој посочи дека од 4 март руска нафта веќе не тече низ нафтоводот „Дружба“ кон Чешка. Според претходни информации, ова се должи на проблеми со плаќањата поради американските санкции кон руските банки, воведени поради војната во Украина.
„Орлен Унипетрол“ презема чекори за диверзификација и веќе нарачал испораки на нафта од Северното Море и други региони, изјави Влечек.
Владата во Прага исто така ставила на располагање до 330.000 тони нафта од државните резерви како заем, што ќе ја покрие побарувачката за околу 90 дена, додаде тој.
Со децении, нафтоводот „Дружба“, изграден во времето на социјализмот, претставуваше главна врска за снабдување со нафта за Чешка, поврзувајќи ги руските нафтени полиња со Централна Европа.
Чешка, заедно со Словачка и Унгарија, доби привремено ослободување од забраната на ЕУ за увоз на руска нафта за да може да развие алтернативни извори. Сепак, земјата сега би можела да ја прекине зависноста од руската нафта побрзо од очекуваното.
Како потенцијална алтернатива, се разгледува Трансалпскиот гасовод (TAL), кој снабдува нафта од италијанското пристаниште Трст до Централна Европа. Неговите капацитети неодамна беа зголемени преку проектот TAL-Plus.
Од Сања Костовска Извор МИА
