Возачите ширум Европа сè почесто се соочуваат со реалноста дека електрифицираните возила не се толку економични како дизелите, и покрај силниот притисок на ЕУ за нивно воведување. Европската комисија веќе работи на постепено исфрлање на повеќе од 100 милиони дизел автомобили од употреба, што претставува голем предизвик за граѓаните и автомобилската индустрија.
Иако продажбата на хибридни и електрични возила расте последниве години, дизел автомобилите и понатаму доминираат на европските патишта. Тие сè уште сочинуваат значителен дел од возниот парк, бидејќи за многу семејства се најисплатлива опција и претставуваат долгорочна навика.
Една од причините за ваквата ситуација е стареењето на европскиот возен парк – голем број автомобили се постари од 15 години. Милиони возачи не се подготвени да ги заменат своите стари дизели, па европските намери за забрана на продажбата на нови возила со мотори со внатрешно согорување до 2035 година дополнително ги усложнуваат состојбите.
Доколку забраната навистина стапи на сила, традиционалните автомобили ќе исчезнат од продажните сали, што според дел од производителите би можело да ја доведе европската автоиндустрија во криза. Во исто време, возачите би можеле да се соочат со ограничена мобилност, повисоки трошоци и помал избор – сценарио кое многумина го сметаат проблематично.
