Македонија денеска ја очекува променливо облачно време со локална нестабилност. Управата за хидрометеоролошки работи (УХМР) најавува појава на пороен дожд и грмежи, а на одделни места услови за краткотрајно невреме.
Локално се очекуваат пообилни врнежи со над 20 литри дожд на квадратен метар за краток временски период, проследени со засилен северен ветер кој ќе достигнува брзина од над 60 километри на час. Можно е и изолирано појавување на град.
Температурите денеска ќе се движат од минимални 12 до 20 степени, а максималните ќе достигнат меѓу 26 и 32 Целзиусови.
Во Скопје времето ќе биде променливо облачно и нестабилно, со пороен дожд и грмежи, локално и во форма на краткотрајно невреме. Во текот на денот ќе дува слаб до умерен северен ветер. Минималната температура ќе изнесува околу 17, а максималната ќе достигне до 30 степени.
Според прогнозата на УХМР, од утре следува период на претежно стабилно време. До недела ќе дува слаб до умерен северен ветер, додека од понеделник се очекува ветерот да го смени правецот и да дува од југ.
