Вашингтон, 24 мај 2025 (МИА) – Во најновиот извештај на американската Одбранбена разузнавачка агенција (ДИА) се наведува дека Северна Кореја има најсилна стратешка позиција во изминатите неколку децении.
– Северна Кореја во моментот има најповолна стратешка позиција по повеќе децении и располага со воени капацитети кои можат да ги загрозат американските трупи и нивните сојузници во Североисточна Азија. Во исто време продолжува да развива потенцијали за директна закана по територијата на САД, се наведува во извештајот на ДИА посветен на глобалните закани во 2025 година.
Исто така се истакнува дека севернокорејскиот лидер Ким Џонг-ун „е сè посигурен во својот меѓународен легитимитет и стабилноста на режимот“.
ДИА потенцира дека Русија, во замена за поддршка во војната во Украина, се повеќе ги споделува вселенската, нуклеарната и ракетната технологија со Северна Кореја, но и со Кина и Иран, со што им овозможува технолошки напредок во развој на оружје за масовно уништување во следните три до пет години.
– Северна Кореја и понатаму на недозволен начин набавува компоненти за својата ракетна програма, која не може сама да ги произведе, често со помош на кинески и руски државјани, се посочува во извештајот на ДИА.
Исто така, се наведува дека Пјонгјанг речиси сигурно ќе продолжи да извезува балистички системи и сродна технологија за Русија.
– Северна Кореја продолжува да го проширува својот нуклеарен арсенал, зголемувајќи ги резервите преку производство на плутониум и високо збогатен ураниум, предупредува ДИА.
Јужнокорејската новинска агенција (Јонхап) објави дека предупредувањето за Северна Кореја е во момент кога расте загриженоста поради нејзиниот забрзан развој на нуклеарно и балистичко оружје, како и воено-техничката соработка со Русија во рамките на Договорот за стратешко партнерство, потпишан во јуни минатата година.
Извештајот за Северна Кореја е дел од анализата на ДИА за глобалните закани во 2025 година, во кој се анализираат и Кина, Русија, Иран и други држави.
Од Марина Илиевска Извор МИА
