Регионалниот пат Македонски Брод – Скопје останува затворен за сите видови возила поради пожарот во Националниот парк „Јасен“, соопштуваат од АМСМ. Сообраќајот на државните патишта продолжува да се одвива без пречки, при што коловозите се претежно суви. Интензитетот на сообраќајот надвор од градовите е зголемен, особено во текот на летните одмори.
На граничниот премин „Табановце“, времето на чекање за влез во државата е околу 30 минути, додека на „Богородица“ времето на чекање за излез изнесува околу 20 минути. На останатите гранични премини од македонска страна, не се забележуваат подолги задржувања.
АМСМ упатува препораки за прилагодување на брзината на движење и почитување на сообраќајната сигнализација. Возачите треба да бидат особено внимателни на патиштата во котлините, речните долини и клисурите, каде постои можност за одрони. Ова важи за делниците Катланово – Велес, Маврово – Дебар – Струга, Виница – Берово и Кочани – Делчево.
Од 1 јули до 31 август, на државните патишта во Македонија се воведува летен режим на сообраќај, кој забранува движење на тешки товарни возила со вкупна маса над 15 тони за време на викендите и во денови со екстремно високи температури.
