Во насока на унапредување на средното стручно образование и поттикнување на младите да се стекнат со применливи вештини, Владата и Министерството за образование и наука издвојуваат 50 милиони денари за стипендирање на новите ученици во дуално образование од септември.
Во учебната 2025/2026 година, предвидени се вкупно 1.570 стипендии, секоја во износ од 3.500 денари месечно, кои ќе се исплаќаат во текот на девет месеци. Право на стипендија ќе имаат учениците кои ќе се запишат во дуални паралелки и ќе ги исполнат условите од конкурсот.
„Реалниот сектор има зголемена потреба од стручни и квалификувани кадри. Со оваа мерка ги мотивираме младите да изберат стручно образование и да се стекнат со конкретни знаења и вештини што ќе ги направат поконкурентни на пазарот на труд“, се наведува во соопштението на Владата.
Дополнително, над 550 компании веќе се вклучени во реализацијата на практичната обука, што претставува мост меѓу образованието и стопанството. Ова, според Владата, значи дека учениците добиваат реална можност по завршување на образованието директно да се вклучат во работниот процес.
„Создаваме систем што ќе им овозможи на младите да останат во државата, да изградат стабилна иднина и да придонесат во развојот на економијата. Образованието е темелот врз кој ја градиме модерна Македонија. Враќаме надеж и отвораме патишта за просперитет“, стои во соопштението од владината прес-служба.
Мерката се очекува не само да ја намали невработеноста, туку и значително да го подигне квалитетот на образованието и да ја зајакне врската помеѓу учениците и потребите на пазарот на труд.
