На денешната прес конференција, Движењето ЗНАМ – За Наша Македонија ги објави носителите на советничките листи за претстојните локални избори во градот Скопје и околните општини. Портпаролот на Движењето, Никола Мемов, истакна дека ЗНАМ ја претвора довербата на народот во силни советнички листи, како и во конкретни програми и проекти кои ќе донесат вистинска промена. „Зад нас се месеци исполнети со посветена работа на терен, во кои преку двете кампањи низ целата држава илјадници граѓани ни ја доверија волјата за подобар живот во своите општини“, рече Мемов.
Тој нагласи дека на последната седница на Извршниот одбор на Движењето е донесена одлука за учество со советнички листи во 53 општини, плус Градот Скопје. „Оваа бројка е гласот на народот и доказ дека Движењето ЗНАМ е најбрзо растечкото движење во Македонија“, додаде Мемов. Во редовите на ЗНАМ за кандидати за членови на совет се приклучија професионалци од различни области, вклучувајќи доктори, професори и спортисти.
Мемов ги соопшти носителите на советничките листи во скопските општини: за Аеродром е предложен Љупчо Марковски Калц, за Центар м-р Крумислав Мишко Барзов, за Карпош проф. д-р Јасмин Циривири, за Бутел Ѓорги Станко Чековски, за Гази Баба Зоран Доневски, за Ѓорче Петров Тони Симиќ, за Кисела Вода Сашо Петровски и за Чаир Николче Наумов. Мемов истакна дека овие кандидати имаат интегритет и искрена намера да работат за своите заедници.
„Тие се нашата најголема гаранција дека ветувањата ќе станат дела, дека ќе изградиме поуредени општини и подобар квалитет на живот за сите“, рече Мемов. Тој исто така објави поддршка за натпартискиот кандидат за градоначалник на Општина Кочани, д-р Влатко Грозданов, нагласувајќи дека нивната борба не е за партиски интереси, туку за визија и напредок.
Во Скопје, носител на листата ќе биде Генерал Горанчо Котески, поранешен Началник на Генералштабот на АРМ. Мемов го опиша Котески како човек кој целосно се посветил на одбраната на државата и кој сега носи визија за развој на главниот град. На градската листа се предложени и познати личности како проф. д-р Билјана Андреска Богданоска, проф. д-р Горан Ајдински и Мире Јанев, сопственик на култниот локал „Плеј кафе“.
„Ова се луѓе кои го чувствуваат пулсот на градот и се подготвени да го вратат Скопје на граѓаните – чисто, современо и достоинствено“, рече Мемов. Тој нагласи дека на листата се и актуелни носители на јавни функции кои покажуваат како треба да се раководат институциите во Македонија. „Силата на ЗНАМ секојдневно расте – во секоја општина, во секој дом, во секое семејство“, заклучи Мемов.
