Истанбул, 27 март 2024 (МИА) – Неопходно е да се зголеми притисокот врз Израел да се усогласи со резолуцијата на Советот за безбедност на Обединетите нации со која се бара итен прекин на огнот во Газа, изјави денеска турскиот претседател, Реџеп Таип Ердоган, јавија турските медиуми.
-Мора да се зголеми притисокот врз Израел, разгалено дете на Западот што не го почитува законот, да ја почитува оваа одлука, рече Ердоган на предизборниот митинг во провинцијата Батман во источна Турција.
Тој, исто така, вети дека Турција ќе ги направи сите можни напори за спроведување на одлуката на Советот за безбедност на ОН.
-Како Турција, ќе го направиме нашиот дел за да обезбедиме исполнување на оваа одлука, која ја поздравуваме, рече Ердоган.
Тој додаде дека Анкара ќе ги преземе сите неопходни напори за да обезбеди Палестинците во Газа да живеат во мир и спокојство што е можно поскоро.
Обвинет за геноцид, Израел започна смртоносна воена офанзива против Појасот Газа по прекуграничниот напад на Хамас во кој загинаа околу 1.200 Израелци на 7 октомври минатата година.
Оттогаш, околу 32.500 Палестинци се убиени, а 74.900 се повредени за време на масовното уништување и недостигот на залихи.
Советот за безбедност на Обединетите нации во понеделникот усвои резолуција со која се бара итен прекин на огнот во Газа за време на исламскиот свет месец Рамазан.
Од Марија Спасовска Извор: МИА
