Хаг, 22 мај 2025 (МИА) – Во глобална акција за сузбивање на Дарк-веб, насочена кон онлајн мрежи за борба против дрогата и криминалот, во операција „RapTor“, 270 лица, продавачи и купувачи, беа уапсени во десет земји на четири континенти, соопшти Европол.
Во соопштението за медиумите се наведува дека во операцијата „RapTor“ биле разбиени меѓународни мрежи што тргувале со дрога, оружје и фалсификувана стока, а осомничените биле идентификувани преку координирани истраги врз основа на разузнавачките информации добиени од уништувањето на пазарите на Дарк-веб – Nemesis, Tor2Door, Bohemia и Kingdom Markets.
Агенциите за спроведување на законот во десет земји извршија апсења на лица осомничени за илјадници продажби на нелегални пазари, користејќи алатки за енкрипција и криптовалути за да ги прикријат своите траги.
Во САД, во операцијата „RapTor“ беа уапсени 130 лица, во Германија 42, Велика Британија 37, Франција 29, Јужна Кореја 19, Австрија и Холандија по четири, Бразил три и Швајцарија и Шпанија по едно.
Во тек се истраги за пронаоѓање и апсење на дополнителни лица вклучени во криминалот.
Во меѓународната операција се запленети над 184 милиони евра во готово и криптовалути, повеќе од два тона дрога, над 180 парчиња огнено оружје, 12.500 фалсификувани производи и над 4 тони нелегален тутун.
Од Златко Шумковски Извор МИА
