Македонската фудбалска заедница е завиена во црно по трагичната вест дека меѓу жртвите на терористичкиот напад на плажата Бонди во Сиднеј се наоѓа и фудбалерот на ФК Рокдејл Илинден, 27-годишниот Ден Елкајам. Во крвавиот инцидент, кој го потресе австралискиот и светскиот јавен простор, животот го загубија вкупно 15 лица, додека уште 40 беа повредени.
Од фудбалскиот клуб Рокдејл Илинден со длабока тага ја потврдија веста за загубата на својот играч, наведувајќи дека Елкајам бил жртва на, како што велат, „страшните и бесчувствителни настани“ што се случиле во неделата, на 14 декември 2025 година.
„Ден беше неизоставен дел од нашиот тим, исклучително талентиран фудбалер и личност која уживаше голема почит и љубов меѓу соиграчите. Загубата е огромна, а нашите мисли и сочувство се со неговото семејство, пријателите и сите кои го познаваа. Ќе ни недостасува неизмерно. Нека почива во мир“, соопштија од клубот.
Нападот се случил за време на јавен настан на плажата Бонди, организиран по повод првиот ден од еврејскиот празник Ханука. Австралиските власти официјално го класифицираа инцидентот како терористички чин, а истрагата за мотивите и околностите на нападот е во тек.
