Во насока на подобрување на условите за младите семејства, Општина Центар активно инвестира во образовната и социјалната инфраструктура. Кандидатот за градоначалник, Горан Герасимовски, на неодамнешната средба со универзитетскиот професор Ило Трајковски, нагласи дека младата популација е клучен фактор за развојот на здрава заедница.
Герасимовски истакна дека по шест децении, конечно е завршена изградбата на градинката „Пролет“, која има капацитет за 170 деца и е изградена според скандинавски стандарди. Планирана е изградба на уште една градинка со 100 места во близина на Клиничкиот центар, што дополнително ќе ја зголеми достапноста на услуги за родителите.
„За да им излеземе во пресрет на младите семејства, воведуваме двосменско работење до 22 часот во градинките. Месечната цена за престој е само 1.490 денари по дете, што е значително пониско од цените во приватните установи. Ова се конкретни мерки, а не празна реторика за вистинска поддршка на младите семејства,” изјави Герасимовски.
На средбата, Герасимовски и Трајковски разговараа и за социолошките предизвици со кои се соочуваат младите, особено за вандализмот, кој претставува сериозен проблем. Тие се согласија дека преку воспитувањето и образованието, како и воведувањето општествено корисна работа, може да се развие чувство за одговорност и почит кон јавните добра.
