Членките на НАТО мора да се подготват за можен руски напад во наредните четири години, предупреди началникот на Генералштабот на германската армија, генерал Карстен Бројер. Во изјава за „Би-би-с“, тој изрази сериозна загриженост за растечките воени капацитети на Русија и потенцијалната закана што таа ја претставува за балтичките земји-членки на Алијансата.
Бројер посочи дека Русија во моментов произведува околу 1.500 борбени тенкови годишно, што според него не се користат сите во Украина, туку и за нови единици кои се распоредуваат кон западната граница.
„Сведоци сме на натрупување на залихи за можен иден напад врз балтичките земји. Аналитичарите проценуваат дека тоа би можело да се случи до 2029 година, но јас велам дека мора да бидеме подготвени уште вечерва“, изјави Бројер.
Тој истакна дека Русија само во 2024 година произвела четири милиони артилериски гранати од 152 милиметри, од кои дел се складираат за идни воени дејства. Според него, ваквото темпо на милитаризација претставува најголемата безбедносна закана што ја видел во својата 40-годишна воена кариера.
Во контекст на претстојниот НАТО самит во Хаг, Бројер посочи дека Алијансата мора да демонстрира единство и решителност, особено имајќи ги предвид неодамнешните разлики во ставовите на Унгарија и Словачка за поддршката на Украина.
Како потенцијално најранливо подрачје, генерал Бројер го истакна т.н. Сувалки коридор — стратешка област што ги поврзува Полска и Литванија, а се граничи со рускиот Калининград и Белорусија. Според него, ова е „можна точка на запалување“ која би можела да биде цел на хибридни или конвенционални закани.
