Прометот во трговијата на мало продолжува да расте и во последниот месец од 2025 година, но зад бројките се крие појасна слика: граѓаните трошат повеќе за храна и основни производи, додека купувањето непрехранбена стока бележи пад.
Според најновите податоци на Државниот завод за статистика, во декември годинава, во споредба со истиот месец лани, реалниот промет во трговијата на мало со храна, пијалаци и тутун е зголемен за 4,6 проценти. Номинално, растот е уште повисок и достигнува 11,5 проценти, што укажува и на влијание од повисоки цени.
Токму основните производи ја „влечат“ трговијата нагоре. Граѓаните најмногу трошеле во маркетите и продавниците за секојдневни намирници, додека кај непрехранбените производи ситуацијата е поинаква. Во овој сегмент е регистриран номинален раст од само 1 процент, но реално има пад од 3 проценти, што значи дека куповната моќ за облека, техника и други производи е ослабена.
Кога ќе се изземе трговијата со горива, вкупниот промет на мало бележи умерен раст – номинално 6,3 проценти, а реално 0,8 проценти. Кај горивата, пак, има мал реален пораст од 1,5 проценти, но номинално се бележи намалување од 1,6 проценти, што се поврзува со пониски цени на пазарот.
Податоците упатуваат дека потрошувачката се концентрира сè повеќе кон основните животни потреби, додека купувањето „луксузни“ или дополнителни производи останува воздржано. Ова е јасен сигнал дека домашните буџети се под притисок, и покрај формалниот раст на прометот.
