Грција и Кипар изразија силно несогласување со намерата на Европската комисија да ја вклучи Турција во инструментот на ЕУ познат како „Безбедносна акција за Европа“ (САФЕ), кој е наменет за финансирање на проекти поврзани со одбраната. Владата во Атина оцени дека „ниту една држава што официјално одржува воинствена реторика кон земја членка на ЕУ, не може да се приклучи кон европските одбранбени програми или партнерства“. Оваа изјава доаѓа во контекст на долгогодишниот спор помеѓу Грција и Турција, особено во однос на Кипар и разграничувањето на територијалните води во Егејското Море.
Никозија, која официјално го претставува целиот Кипар, исто така се противи на вклучувањето на Турција во САФЕ. Иако контролира само јужниот дел на островот, северниот дел е под турска контрола од 70-те години на минатиот век, каде е прогласена „Турската Република Северен Кипар“, призната само од Анкара. Портпаролот на Европската комисија за технолошка сувереност, одбрана, Вселената и истражување, Тома Рение, потврди дека „право на учество во проекти финансирани преку инструментот САФЕ имаат и трети земји кои не се членки на ЕУ“, додавајќи дека Турција веќе поднела формално барање за учество.
Рение истакна дека „на трети земји им е дозволено да учествуваат во САФЕ“ и дека „дозволено им е да бидат вклучени во национални инвестициски проекти што ќе ги достават земјите членки, со учество до најмногу 35 отсто“. Сепак, тој нагласи дека при одобрување на учеството на трети земји во САФЕ, ќе се води сметка за заштита на интересите на членките на ЕУ. Доколку некоја од државите апликанти претставува реална безбедносна закана за членка на Унијата, таа ќе биде исклучена од проектот.
Одлуката во Советот на ЕУ за евентуалното учество на Турција во САФЕ треба да се донесе со квалификувано мнозинство, што значи дека Грција и Кипар не можат директно да ставата вето. Сепак, во прашања поврзани со одбраната, земјите членки обично се стремат кон постигнување консензус, што би можело да ги намали шансите на Анкара за вклучување во САФЕ. Дури и ако не се појави директно противење, постапката за разгледување на барањето на Турција може да се одолговлекува, бидејќи во Регулативата за инструментот не е наведен конкретен временски рок за разгледување на барањата. На крајот, некои аналитичари гледаат на евентуалното пристапување на Турција до САФЕ како на можност за одоброволување на Анкара, со цел да се откаже од приговорот за споделување на тајни документи на НАТО со Европската Унија.
