Повеќе од 150 дивоградби во општина Чаир стануваат предмет на еден од најголемите урбанистички скандали во Скопје, изјави денеска Љубица Јанчева, координаторка на советничката група на СДСМ во Советот на Град Скопје, на прес-конференција.
Според Јанчева, наместо институциите да преземат одговорност, случајот добива нови димензии, а бројот на инволвирани расте. Таа информираше дека Катастарот донел решение за бришење на претходно запишаните легализации за над 150 дивоградби, кои, како што се тврди, биле запишани врз основа на фалсификувани документи.
„Фрапантно е што на место каде што била предвидена улица, била изградена зграда. Општина Чаир издава документ што го потврдува тоа, но тој документ потоа мистериозно исчезнува“, рече Јанчева.
Таа постави и серија прашања, обвинувајќи за можна вмешаност на директорот на Катастарот, Иван Живковски, поранешен претседател на Советот на општина Кисела Вода и кадар на ВМРО-ДПМНЕ. „Каква корист имаат ВМРО-ДПМНЕ и нивниот коалициски партнер ВЛЕН од овие дивоградби?“ праша таа.
Јанчева најави дека советничката група на СДСМ поднела барање за итна седница на Советот на Град Скопје, на која би се расправало за овој случај, но и за евентуални слични случаи во други општини под власт на ВМРО-ДПМНЕ, ВЛЕН и ЗНАМ.
„Советот не смее да дознава за вакви прашања од медиумите. Граѓаните очекуваат одговорност и транспарентност“, порача Јанчева, повикувајќи ги сите советници да го поддржат барањето за седница.
