Амстердам, 21 септември 2024 (МИА) – Холандија врати во Индонезија 288 културни предмети од холандската национална колекција. Тие беа незаконски земени за време на колонијалниот период и се од културно значење за Индонезија, соопшти Министерството за образование, култура и наука.
Станува збор за четири хинду-будистички статуи донесени во Холандија од островот Јава во првата половина на 19 век. Други предмети вклучуваат оружје, монети, накит и текстил земени во 1906 година по војната со локалните владетели на Бали.
Досега овие предмети беа под управување на Светскиот музеј во Амстердам, кој има филијали во Ротердам и Лајден. Индонезија побара артефактите да се вратат, а Комитетот за колонијални колекции ја советуваше владата да го стори тоа.
-По втор пат враќаме предмети кои никогаш не требало да бидат во Холандија. Грабежите и другите облици на присилно губење на сопственоста на културните добра често се случувале за време на колонијалниот период. Враќањето на овие предмети е материјално враќање на правдата, рече министерот за образование, култура и наука Епо Броинс, цитиран од прес-службата на Министерството.
Минатата година, Холандија ги врати предметите во Индонезија и Шри Ланка откако земјите ги побараа. Во моментов се оценуваат барањата од Индонезија, Шри Ланка, Нигерија и Индија.
Од Марија Спасовска/МИА
