Бамако, 7 мај 2025 (МИА) – Воената хунта во Мали ги суспендира активностите на политичките партии и другите политички организации „до понатамошно известување“, со образложени да се зачува јавниот ред
Националната телевизија го објави декретот потпишан од преодниот претседател на Мали, генерал Асими Гојта.
Минатата недела Националната политичка конференција побара Гојта да биде именуван за претседател на Мали со мандат од пет години. Конференцијата, исто така, препорача распуштање на сите политички партии и заострување на условите за создавање нови партии.
Поради тоа на 3 мај беа организирани првите продемократски демонстрации, откако армијата ја презеде власта пред четири години. Протести се најавени и в петок.
Гојта на власт дојде по воените удари во 2020 и во 2021 година. Хунтата првично се обврза да одржи избори во февруари 2022 година, но рокот е пролонгиран неколку пати. Во 2024 година, Мали формираше пакт за соработка познат како Алијанса на државите од Сахел (АЕС) со своите соседи во осиромашениот регион Сахел, Буркина Фасо и Нигер, откако ги прекина долгогодишните воени врски со Франција и другите западни сили.
Од Марина Илиевска Извор МИА
