Бројот на работниците во индустријата во август 2025 година е намален за 2,6 проценти во однос на истиот месец лани, покажуваат податоците на Државниот завод за статистика.
Според секторите, во рударството и вадењето на камен има пад од 1,7 проценти, во преработувачката индустрија намалувањето е 2,7 проценти, додека кај снабдувањето со електрична енергија, гас, пареа и климатизација е забележан пад од 0,6 проценти.
Анализирано по главни индустриски групи, бројот на вработените е намален кај енергијата за 1,8 проценти, капиталните производи за дури 7,1 проценти и нетрајните производи за широка потрошувачка за 2,2 проценти. Од друга страна, раст е забележан кај трајните производи за широка потрошувачка за 7,3 проценти и интермедијарните производи (освен енергија) за 1,0 процент.
Во периодот јануари – август 2025, во однос на истиот период во 2024 година, бројот на работниците во индустријата е намален за 3,8 проценти – тренд кој укажува на континуирано слабеење на индустрискиот пазар на труд.
