Ирска започна пробна фаза на проектот Government Digital Wallet, нова платформа која ќе им овозможи на граѓаните да чуваат клучни лични документи во дигитален формат. Оваа иновација ќе им помогне и да ја потврдат својата возраст за пристап до социјалните мрежи.
Според информациите од ресорното министерство, корисниците ќе можат да складираат дигитални верзии на изводи од матичната книга на родените, возачки дозволи, европски картички за здравствено осигурување и други документи. Министерот Франк Фејхан истакна дека целта на тестирањето е развој на систем кој е лесен за користење, со посебен акцент на безбедна проверка на возраст.
Оваа мерка е дел од пошироката стратегија Digital Ireland и спроведувањето на Кодексот за безбедност на интернетот, кој обврзува одредени платформи да воведат проверка на возраст за да ги заштитат децата и младите од штетни содржини на интернет, пренесува PC Press.
Иако точниот датум на официјалното лансирање сè уште не е утврден, Ирска е обврзана според регулативата на Европската унија да воведе дигитален новчалник до крајот на 2026 година. Пилот фазата функционира на основа на доброволна пријава, а слични методи за проверка на возраст развиваат и други членки на ЕУ.
За потсетување, Шпанија на почетокот на оваа година најави радикални мерки – целосна забрана за користење на социјалните мрежи за лица помлади од 16 години.
