Основното јавно обвинителство во Скопје започна истражна постапка против 19-годишен маж, осомничен за неовластено производство и продажба на наркотични дроги. Според информациите, осомничениот бил уапсен на 31 август во близина на детска градинка на улицата “Наум Евро” во Скопје, каде што бил затекнат со 100 пакувања марихуана, со вкупна тежина од околу 80 грама, наменети за продажба.
Кога забележал полициските службеници, осомничениот се обидел да избега и во паника фрлил дел од дрогата во двор на ненаселена куќа. Меѓутоа, полицијата успеала да ја обезбеди дрогата и да го фати осомничениот, кој во тој момент давал отпор и се обидувал да се ослободи.
Поради ризикот од бегство и можноста за повторување на делото, јавниот обвинител предложи мерка притвор, која ќе биде разгледана од судијата на претходна постапка во Основниот кривичен суд во Скопје.
