Градоначалникот на општина Карпош, Стевчо Јакимовски, јавно му понуди на министерот за спорт, Борко Ристовски, Општина Карпош да ги преземе и покрие сите трошоци за базенот и спортската сала „Партизан“.
„Греота се овие деца. Аква паркот е затворен, базенот ‘Борис Трајковски’ е затворен, овој базен е готов, но не се пушта во употреба. Знам дека немаат ниту денар платено за него. Општина Карпош е подготвена да ја преземе обврската – тоа е околу 37 милиони денари за исплата на базенот. Исто така, нудиме да го преземеме и долгот за реконструкцијата на салата, на одредени рати, за да не правиме циркуз и да не ги вознемируваме граѓаните“, изјави Јакимовски во гостувањето на ТВ 24.
Тој нагласи дека станува збор за два објекти кои нема да носат значителни приходи, но ќе бараат стабилна поддршка за одржување. „И ред е овие објекти да бидат во рацете на општина Карпош. Ние само ќе ги модернизираме. Како што впрочем тоа сме го направиле со сите други објекти кои ни биле доверени од државата кои многукратно сме ги унапредиле (училиштата, градинките, месните заедници, општинска зграда), нагласи Јакимовски.“, додаде градоначалникот.
