Пред претставници на медиумите, градоначалникот на Општина Карпош, Стевчо Јакимовски, денеска официјално ја потврди својата кандидатура за нов мандат.
„Одлуката ја донесов по долготрајни консултации со граѓаните и по внимателно следење на јавното мислење. Сите ме знаете, мојот телефон е отворен и комуницирам со секого – токму тоа е доказ дека постои силна поддршка и желба повторно да ја водам општината,“ изјави Јакимовски.
Тој истакна дека довербата од граѓаните не се должи на симпатии, туку на конкретни резултати.
„Карпош е десет до петнаесет години пред било која општина во Македонија. Имаме модерна инфраструктура, реновирани училишта и градинки, подобрени услови за образование и спорт, како и подготвена администрација која стои зад секој реализиран проект,“ нагласи градоначалникот.
Меѓу главните предизвици, Јакимовски ги посочи паркирањето, хигиената и зеленилото, за кои побара нови законски решенија:
„Недозволиво е десетина градоначалници и стотици функционери да бидат надлежни, а резултатите да бидат катастрофални. Одговорноста мора да е јасна и да дојде кај локалната самоуправа,“ порача тој.
„Карпош мора да биде чекор пред сите. Изборите се можност за граѓаните повторно да ја одберат патеката на развој, а не тапкање во место,“ ја заокружи Јакимовски својата изјава.
