Сообраќајот на државните патишта во земјава утрово се одвива без поголеми пречки, но по претежно влажни коловози, информира Авто-мото сојуз на Македонија.
Слаби врнежи од снег се регистрирани на планинските премини Ѓавато и Буково, но без задржување на снег на коловозите. Во исто време, возачите треба да бидат особено внимателни поради намалена видливост и магла на неколку патни правци.
На Плетвар и во правец кон Крушево видливоста е намалена до 50 метри, додека на превојот Стража и на патниот правец Тетово – село Лисец таа изнесува околу 80 метри.
Од 15 ноември 2025 година на сила е законската обврска за задолжително поседување зимска опрема во сите возила, без разлика на временските услови. Оваа мерка ќе важи до 15 март 2026 година.
Интензитетот на сообраќај надвор од градските средини е умерен, а на граничните премини, од македонска страна, нема подолги задржувања за влез и излез од државата.
Од АМСМ апелираат на прилагодена брзина, почитување на сообраќајната сигнализација и внимателно управување со возилата, особено на патиштата низ котлини, речни долини и клисури, каде постои зголемен ризик од одрони.
Како критични се издвојуваат делниците:
- Катланово – Велес
- Маврово – Дебар – Струга
- Виница – Берово
- Кочани – Делчево
Патниот правец Охрид – Ресен преку Националниот парк Галичица е затворен за сообраќај за сите видови возила од 21 ноември 2025 до 31 март 2026 година.
Воедно, активни се и повеќе градежни работи и измени на режимот на сообраќајот:
- На делницата Прилеп – Битола (Коридор 10) сообраќајот е пренасочен по регионалниот пат Р1101
- На скопската обиколница (А2) се врши рехабилитација со затворена лева лента
- На експресниот пат Крива Паланка – Страцин сообраќајот се одвива со рачна регулација во дневни услови
- Активна е санација на свлечиште на регионалниот пат Косоврасти – Мелнички Мост
- Воведена е временска семафоризација кај мостот Здуње на патот Гостивар – Стража
