Камионџиите од Србија и Босна и Херцеговина се подготвуваат за блокада на хрватските граници, предупредувајќи дека без итно решение, ситуацијата може да доведе до целосен колапс на транспортниот систем. “Ако не се најде решение за проблемите со новиот систем за влез во Шенген, сите ќе застанеме. Настанува колапс!” – изјави Неџо Мандиќ, претседател на Пословното здружение за меѓународен транспорт.
Според Мандиќ, проблемот е во новите правила кои се применуваат за професионалните возачи, што создава хаос на границите. Возачите и стоката често се враќаат назад, а апелите за помош до европските институции остануваат без одговор. “Ние веќе неколку години испраќаме предупредувања до Европската комисија, но никој не реагира”, додава тој.
Ситуацијата стана уште потешка со проширувањето на Шенген, каде старите правила за 90 дена престој во период од 180 дена повеќе не се применливи. “Денес, кога вклучите камион, веќе сте во Шенген. Овие 90 дена не се доволни за работа”, објаснува Мандиќ, истакнувајќи дека новите правила ќе им овозможат на возачите само 9 до 10 дена работа месечно.
Ако до 10. април не се направат промени, 99,9% од возачите од Србија, Босна и Македонија нема да можат да влезат во ЕУ. “Сите камиони ќе застанат, а ланците на снабдување ќе се прекинат”, предупредува Мандиќ.
Проблемот дополнително се комплицира со веќе постоечките долги чекања на границите. Странските превозници од ЕУ не сакаат да испраќаат камиони во Србија, што дополнително ги оптоварува домашните компании. Мандиќ укажува на тоа дека ако продолжат да чекаат по три дена на границите, многу компании ќе се соочат со колапс.
Поради растечките притисоци, превозниците поставија рок до 15. јануари за решавање на проблемот, инаку блокадите се неизбежни. “Не планираме целосна блокада, но ќе блокираме терминали на граничните премини за товарен транспорт. Ние се бориме за опстанокот на нашите возачи”, заклучува Мандиќ.
