Американскиот претседател Доналд Трамп го одобри предлог-законот за нов пакет санкции против Русија, со кој се предвидуваат драстични царини од дури 500 проценти за увоз на стоки од земји што купуваат руска нафта, нафтени деривати или ураниум. Законот сега влегува во натамошна законодавна постапка, соопшти американскиот сенатор Линдзи Греам.
Според Греам, со предложените мерки претседателот ќе добие овластување директно да ги казнува земјите кои, преку купување на евтини руски енергенси, индиректно ја финансираат воената машинерија на Владимир Путин.
Притисок врз купувачите на руска нафта
Целта на законот е значително да се намалат приходите на Москва од извоз на енергенси и да се обесхрабрат држави како Кина, Индија и Бразил од заобиколување на постојните американски санкции, пренесува Фокс њуз.
Греам изјави дека гласањето за законот би можело да се одржи уште следната недела и дека очекува широка поддршка и од републиканците и од демократите, што укажува на редок момент на двопартиска согласност во американскиот Конгрес.
Можно гласање, но и отпор
Иако американските медиуми наведуваат дека гласањето е блиску, истовремено предупредуваат дека предлог-законот сè уште може да претрпи измени и дека не е исклучен отпор од дел од конгресмените, особено поради потенцијалното влијание врз глобалната трговија и цените на енергенсите.
Ескалација на тензиите меѓу Вашингтон и Москва
Поддршката на Трамп за новите санкции доаѓа во чувствителен момент, по дополнителното заострување на односите меѓу Соединетите Американски Држави и Русија. Само ден претходно, американските сили го запленија танкерот Маринера, кој пловел под руско знаме, поради наводно кршење на санкциите.
Овој потег се толкува како јасен сигнал дека Вашингтон е подготвен дополнително да го заостри притисокот врз Москва, не само преку директни санкции, туку и преку мерки насочени кон трети земји што соработуваат со Русија.
