Во кинеската покраина Гуиџоу денеска беше пуштен во употреба мост кој веднаш влезе во историјата како највисокиот во светот. Тој е изграден над величествениот Голем кањон Хуиџијанг и се издига неверојатни 625 метри над реката.
Гигантската конструкција е долга 2.890 метри, а главниот распон меѓу столбовите изнесува 1.420 метри – бројки кои го сместуваат овој мост меѓу најголемите инженерски чуда на планетата.
Мостот не е само највисок во светот, туку претставува и нов рекорд во категоријата мостови со најголем распон во планински предели, што дополнително ја нагласува комплексноста и значењето на проектот.
Изградбата траеше три години, а завршувањето беше одбележано со голема церемонија на која присуствуваа инженери, локални власти и бројни набљудувачи.
Висината на овој инфраструктурен колос е речиси двојно поголема од Ајфеловата кула во Париз и го симна од тронот претходниот рекордер – исто така мост лоциран во покраината Гуиџоу.
