Пекинг, 7 март 2025 (МИА) – Кина повикува на преговори за крај на војната во Украина, јавуваат светските агенции.
Овој повик го упати кинескиот министер за надворешни работи Ванг Ји, за време на прес-конференција во кулоарите на седницата на кинескиот парламент.
– Во конфликт нема победници, а во преговори нема губитници. Преговарачката маса е и крај на конфликтот и почетна точка на мирот, изјави Ванг.
Пекинг истакна и дека односите меѓу Кина и Русија остануваат постојани во нестабилниот свет. Ванг Ји нагласи дека овие билатерални односи нема да се променат ниту под влијание на трета страна, ниту поради конкретен настан.
Шефот на кинеската дипломатија, исто така, повика на целосен и траен прекин на огнот во Појасот Газа.
– Ако големите сили навистина се загрижени за народот во Газа, треба да поттикнат целосен и траен прекин на огнот и да ја зголемат хуманитарната помош, потенцираше Ванг.
Кина, исто така ги критикуваше американските царини, оценувајќи ги како неправедни и најави соодветен одговор.
– Кина, водена од хуманитарен дух, неколкупати ѝ помогна на САД. Тие не треба да одговорат со неблагодарност, а уште помалку со наметнување на царини, нагласи Ванг.
Тој додаде дека ако САД го изберат патот на соработката, тоа може да доведе до заемна корист, но ако продолжи силниот притисок, Кина ќе реагира решително.
Од Сања Костовска Извор МИА
