По неодамнешните изјави на американскиот претседател Доналд Трамп во врска со Тајван, портпаролот на Министерството за надворешни работи на Кина, Гуо Џиаку, изјави дека ставот на Пекинг за оваа тема “е доследен и јасен”. Гуо нагласи дека “Тајван е неотуѓив дел од територијата на Кина, а прашањето за Тајван е исклучиво внатрешно прашање на Кина”.
Тој додаде дека начинот на кој ќе се најде решение за прашањето на Тајван “е работа што Кинезите сами треба да ја решат” и повтори дека земјата е подготвена да бара обединување преку мирни средства. “Ние ќе покажеме најголема искреност и ќе вложиме најголеми напори за мирно обединување, но нема да дозволиме ниту една личност или сила да се обиде да го оддели Тајван од Кина на било кој начин”, изјави Гуо.
Во однос на можната посета на Трамп во Кина следната година, Гуо укажа дека дипломатијата помеѓу шефовите на држави игра незаменлива улога во односите помеѓу двете земји и нагласи дека “двајцата лидери одржуваат блиска комуникација”. Кина и Соединетите Држави продолжуваат да имаат тензии околу прашањето на Тајван, на кое Вашингтон испорачува оружје и одржува официјални контакти, и покрај признавањето на принципот една Кина од 1979 година.
