Пекинг, 27 февруари 2025 (МИА) – Портпаролот на кинеското Министерство за одбрана, Ву Чиан изјави дека САД треба да го имплементираат принципот „Америка на прво место“ и да бидат првите што ќе го намалат својот нуклеарен арсенал и воените трошоци.
Ву истакна дека САД, кои го поседуваат најголемиот нуклеарен арсенал во светот, треба да ја преземат одговорноста за нуклеарното разоружување и драстично да го намалат својот нуклеарен арсенал, објави кинеска новинска агенција.
Портпаролот повтори дека Кина се придржува до политиката никогаш да не биде прва што употребила нуклеарно оружје, да води стратегија за нуклеарна одбрана и да го одржува својот нуклеарен потенцијал на минималното ниво неопходно за националната безбедност.
Тој истакна дека американските воени трошоци со години ги надминуваат сите други земји. Ву, исто така, ги предупреди САД дека какви било „лукави трикови“ во однос на кинескиот регион Тајван ќе имаат негативни последици. Кинескиот портпарол нагласи дека луѓето од двете страни на Тајванскиот теснец се дел од истото кинеско семејство и ја повтори посветеноста на Кина за мирно обединување, истакнувајќи дека Кина не исклучува употреба на сила против сепаратистите кои се залагаат за независност на Тајван, како и надворешно мешање.
Тој остро ја осуди продажбата на оружје од САД на Тајван и воените контакти меѓу САД и Тајван, додавајќи дека тајванските власти ги трошат парите на даночните обврзници на вооружување наместо да ги инвестираат во благосостојбата на народот, што на крајот ќе има негативни последици за нив.
Од Рената Пепељугоска Извор МИА
