Хавана, 16 јануари 2025 (МИА) – Куба почна да ослободува затвореници еден ден откако администрацијата на претседателот Џо Бајден ја објави својата намера да ја отстрани островската држава од американската листа на држави кои го поддржуваат тероризмот, објавија американските медиуми.
Според кубанските групи за човекови права, повеќе од 10 лица осудени за различни злосторства биле ослободени во текот на денот. Некои од нив беа уапсени по учеството во историските протести во 2021 година, вклучително и 24-годишниот уметник за тетоважи Реина Јакнара Барето Батиста. Таа беше ослободена од затвор во провинцијата Камагуеј и рече дека со неа биле ослободени и осум мажи.
Во вторникот, американската влада објави дека го известила Конгресот за својата намера да ја отстрани Куба од листата како дел од договорот постигнат со посредство на Ватикан. Кубанските власти ќе ослободат некои од нив пред крајот на мандатот на Бајден на 20 јануари.
Неколку часа подоцна, кубанското Министерство за надворешни работи објави дека владата го известила папата Франциск дека постепено ќе ослободи 553 осуденици додека властите истражуваат правни и хуманитарни начини да го спроведат овој чекор. Хавана не ја споменува одлуката на САД да ја симнат од листата, туку ја поврзува со јубилејната Света година, која Католичката црква ја слави еднаш на секои 25 години.
Кубанската опсерваторија за човекови права објави дека 18 лица се ослободени.
Според американските медиуми, можно е одлуката за отстранување на Куба од списокот на држави кои го поддржуваат тероризмот да биде сменета по инаугурацијата на новоизбраниот американски претседател Доналд Трамп. Марко Рубио, неговиот номиниран за државен секретар, е долгогодишен поддржувач на санкциите против кубанскиот режим.
Од Марија Спасовска Извор МИА
