На последната седница на Главниот одбор на партијата Самоопределување, Албин Курти објави план за формирање на заедничка воена единица со вооружените сили на Република Албанија. Оваа изјава доаѓа во време кога Косово се соочува со длабока политичка и уставна криза, по девет месеци без формирање на ново собрание и влада по парламентарните избори одржани на 9 февруари. Курти истакна дека за следните четири години планираат да издвојат буџет од над една милијарда евра за развој на косовската армија и за зајакнување на меѓународните партнерства.
Во рамките на новата програма наречена „сеопфатна одбрана“, Курти најави обука и опремување на резервисти во случај на мобилизација. Тој исто така нагласи дека Косово ќе продолжи да ги зајакнува стратешките односи со земји како САД, Обединетото Кралство, Германија, Франција, Италија, Турција и сите членки на Европската Унија и НАТО.
Од друга страна, Петар Петковиќ, вршител на должноста директор на Канцеларијата за Косово и Метохија, реагираше на овие најави, оценувајќи ги како директна закана за Србија. Според него, формирањето на воениот сојуз помеѓу Косово и Албанија е дел од политиката на Приштина, која со своите потези се стреми кон создавање на „Голема Албанија“. Петковиќ истакна дека овие воени формации и провокации од страна на Приштина не остануваат незабележани од меѓународната заедница, која досега не реагирала на ваквите активности.
Тој ги критикуваше намерите на Курти, нагласувајќи дека во време на глобални предизвици, создавањето на воени сојузи не придонесува за смирување на ситуацијата, туку напротив, може да доведе до ескалација на конфликтот во регионот.
