Секретарот на Врховниот совет за национална безбедност на Иран, Али Лариџани, го обвини Израел дека има стратегија за „распарчување на Иран“, по заедничките напади со САД.
Во изјава објавена од државната новинска агенција Фарс, Лариџани оцени дека израелското раководство „нема друг избор освен да прибегне кон поделба на големи држави за да го обезбеди сопственото опстанување“.
Тој упати остри критики и кон американскиот претседател Доналд Трамп, нарекувајќи го „совршен симбол на грабеж“, обвинувајќи го дека се обидува да ги преземе иранските ресурси.
Ова е прво обраќање на Лариџани по смртта на врховниот лидер ајатолахот Али Хамнеи, за кого иранските медиуми претходно објавија дека токму него го назначил како лице задолжено да ја води државата во вакви околности.
„Америка и ционистичкиот режим ги изгореа срцата на иранскиот народ – ние ќе ги изгориме нивните“, порача Лариџани, најавувајќи жесток одговор.
Неговата изјава дополнително ги зголемува тензиите на Блискиот Исток, во момент кога регионот се соочува со сериозна безбедносна и политичка неизвесност.
