Сезоната на зимските одмори започна, а Македонците веќе ги избраа своите најпопуларни дестинации за оваа зима. Според податоците од туристичките агенции, најголем интерес за зимски патувања оваа година покажуваат традиционалните зимски дестинации како што се Бугарија и Србија, но и зимава популарна е и Грција
Банско е број еден
Скијачките центри во Бугарија, предводени од Банско и Боровец, се меѓу најпосетуваните места од Македонците. Поволните временски услови за зимскиот период и конкурентните цени привлекуваат сè поголем број на посетители од Македонија. Туристичките агенции забележуваат зголемен интерес за пакети кои вклучуваат и ски инструктори, а исто така и за престој во луксузни хотели и велнес центри.
Србија се повеќе е популарна
Србија се врати на мапата на зимските дестинации за Македонците, со скијачки центри како Копаоник и Златибор, кои привлекуваат туристи поради бројните капацитети, но и понудените активености. Покрај скијањето, од година во година Македонците се заинтересирани и за банскиот туризам. Тука пред се’ се издвојува Врњачка Бања, а од викенд дестинациите и натаму популарни се Београд, Нови Сад и Ниш.
Грција – зимски одмор на топло
Иако Грција е позната по летните одмори, оваа зима земјата станува популарна за зимски патувања, особено за оние кои сакаат да избегнат снегот и студот. Историските локалитети во Солун и Атина, но и сè поголем интерес за посета на островите, особено за време на новогодишните празници, го прават јужниот сосед атрактивна дестинација за зимски одмор. Тука се и еднодневните посети, особено на божиќните пазари.
Истанбул, Рим, Будимпешта…
Во однос на новогодишните патувања, најпопуларни и натаму остануваат Истанбул, Рим, Будимпешта, Прага, Виена, Дубаи… Годинава пораст бележи и интересот за Малта.
Покрај овие новогодишни патувања, за оние со “подлабок“ џеб, популарни се скијачките центри во Италија, Франција и Австрија.
