24 април 2025 година, Скопје, Македонија – Светскиот Македонски Конгрес (СМК) и натаму бара трајна забрана за производство и увоз на генетски модифицирани (ГМО) семиња и животни, како и трајна забрана за увоз на ГМО-храна за луѓето и животните на територијата на државата Македонија и оневозможување на закони и подзаконски прописи во оваа смисла.
СМК бара зголемена контрола на здравјето и животот на луѓето и животните во Македонија и на безбедноста на потрошувачите со континуиран инспекциски надзор, детекција и забрана на ГМО-храната и семенски материјал.
ГМО-посевите и ГМО-храната се опасни и агресивни за околината и потенцијално штетни за човековото здравје.
СМК смета дека Македонија треба да промовира органска храна и органско земјоделско производство, како важен дел на македонскиот одржлив развој, Македонија мора да ги проширува производните површини сертифицирани за органско производство.
СМК го отфрла законодавството на Европската Комисија за користење на семенски материјал што ги забранува домашните автохтони сорти, сметајќи ги ваквите одлуки за економски колонијализам во интерес само на неколку големи мултинационални корпорации, а погубно за македонските земјоделци и државјани.
СМК е солидарен во отпорот против се’ поголемото влијание врз агро-културите што го врши Американската биотехнолошка корпорација МОНСАНТО, како најголем светски производител на ГМО-семиња што на пазарот исфрла голем спектар на генетски модифицирани организми и храна што содржи ГМО.
СМК ги отфрла високопродуктивните и интензивните сорти, бидејќи се зависни од хербициди и хемикалии без кои не успеваат, а се штетни по човековото здравје и причина за загадувањето на животната средина.
СМК ги преферира автохтоните сорти зеленчук и овошје, приспособени на локалните услови, кои за разлика од ГМО-храната се неспоредливо повкусни и побогати со хранливи состојки, не бараат многу вода, заштитни ѓубрива и употреба на големо количество хемикалии, бидејќи се поотпорни на болести, што од друга страна го намалува ризикот за загадување на животната средина и не се опасни по здравјето и животот на луѓето и животните.
