Бруто-домашниот производ (БДП) на Македонија во четвртото тримесечје од 2025 година пораснал за 3,8 проценти во споредба со истиот период од 2024 година, покажуваат проценетите податоци на Државниот завод за статистика.
Растот на економијата во овој период најмногу бил поттикнат од градежниот сектор, како и од стручните, научните и техничките дејности, кои бележат значително зголемување на економската активност.
Најголем пораст е регистриран во секторот градежништво, кој во последниот квартал од годината пораснал за 14,6 проценти.
Значителен раст е забележан и во секторите стручни, научни и технички дејности, како и административни и помошни услужни дејности, каде што економската активност се зголемила за 8,1 проценти.
Финалната потрошувачка продолжува да има најголемо учество во структурата на македонската економија. Во четвртото тримесечје од 2025 година таа номинално пораснала за 6,4 проценти, а нејзиното учество во БДП изнесува 77,9 проценти.
Ова покажува дека домашната потрошувачка и понатаму е главен двигател на економскиот раст.
Позитивни трендови се забележани и кај инвестициите. Бруто-инвестициите во последниот квартал од 2025 година номинално пораснале за 5 проценти, што се должи пред сè на зголемените инвестиции во основни средства.
Според сезонски и календарски прилагодените податоци, растот на БДП во четвртото тримесечје од 2025 година изнесува 3,4 проценти во споредба со истиот период од претходната година.
Анализата покажува дека македонската економија во целата 2025 година остварила раст од 3,5 проценти во споредба со 2024 година.
Извор: Државен Завод за статистика
