Стопанската комора на Македонија, преку проектот што го спроведува во партнерство со УСАИД за Поддршка на приватниот сектор за регионална интеграција, во низата предлози и иницијативи за поддршка на домашните извозни компании, им овозможи учество на домашни компании од прехранбениот сектор на реномираниот меѓународен 61. саем за земјоделство, храна и пијалаци „АГРА 2023“ кој се одржува во периодот од 26 до 31 август во Горна Радгона, Словенија.
Со поддршката преку проектот, Стопанската комора им овозможи логистичка помош за учество на саемот на шест македонски компании: „Лион“-Св. Николе, „Кораб Трница“ – Маврово, „Био-Оил“- Скопје, „В`К Дестилерија“- Скопје, „Туф-Тартуф„- Скопје и „Органаутс“- Неготино.
Саемот АГРА е еден од поголемите и позначајни меѓународни саеми, на кој се претставуваат изложувачи од голем број држави во светот. За таа цел, и оваа година Министерството за земјоделие, шумарство и водостопанство преку Програмата за финансиска поддршка на руралниот развој во делот за маркетинг и промоција имаше закупено национален штанд за македонски извозно ориентирани компании од прехранбениот сектор, со што уште една година по ред Северна Македонија презентира повеќе области од земјоделството, економијата и можностите за инвестирање во развој на бизниси, продлабочување на соработката со Словенија, но и со соседните земји и земјите од регионот.
