Светски Македонски Конгрес оцени дека враќањето на дијалогот со Москва е од суштинско значење за иднината на Европската Унија, потсетувајќи дека Русија, географски и историски, е дел од европскиот континент.
Во соопштението објавено на 17 јануари 2026 година во Берлин, СМК ги поздравува неодамнешните изјави на повеќе европски лидери кои отворено повикаа на обнова на комуникацијата со Русија, оценувајќи ги како чекор во насока на стабилност и безбедност на Европа.
СМК позитивно ги истакнува ставовите на италијанската премиерка Џорџа Мелони, францускиот претседател Емануел Макрон и германскиот канцелар Фридрих Мерц, кои во последниот период ја нагласуваат потребата од политички дијалог со Москва, наместо долгорочна конфронтација.
Според Конгресот, избалансиран однос со Русија и повторно отворање на дипломатските канали се неопходни за зачувување на политичката кохезија, економската стабилност и безбедносната архитектура на Европската Унија.
Во соопштението се потенцира дека Македонците по род и државјанство, без разлика дали живеат во татковината или во дијаспората, и натаму се залагаат за историско руско-украинско помирување.
СМК предлага договор за траен мир и добрососедство меѓу Русија и Украина, со посредство на Соединетите Американски Држави, како единствен реален пат кон долгорочна стабилност на европскиот континент.
Според Конгресот, продолжувањето на конфликтот не носи победници, туку продлабочување на поделбите во Европа, додека дипломатскиот дијалог и компромисите претставуваат основа за нова безбедносна рамнотежа.
„Европската иднина не може да се гради врз трајна конфронтација, туку врз дијалог, меѓусебно почитување и мир“, се наведува во ставот на СМК.
