На денешната прес-конференција, Амар Мециновиќ, кандидат за градоначалник на Скопје од Левица, изјави дека забраната за политичко рекламирање нема да ги спречи во нивната кампања. „Кампањата ја префрламе на улица, без бини и микрофони. Ние ќе бидеме од сабајле до навечер присутни на улиците каде што Скопјани и секој поединачно ќе може да дојде до нас и да разговара“, нагласи Мециновиќ.
Во следните дваесет дена, фокусот на кампањата ќе биде насочен кон состојбата во Град Скопје и јавните претпријатија. Мециновиќ истакна дека постои план за приватизација на јавните услуги, наведувајќи ја депонијата Дрисла како пример. „Ако ни биде доверен мандатот во Советот на Град Скопје и на позицијата градоначалник, првото нешто што ќе го направиме е да се симнеме кај работниците. Со сите работници на јавните претпријатија ќе седнеме и ќе разговараме за условите во кои тие работат“, рече тој.
Според Мециновиќ, јавните претпријатија со години се запоставувани, а тоа е дел од стратегијата за оправдување на нивната приватизација. „На 6 септември најавивме дека постои план за приватизација на Комунална хигиена и на Дрисла. Четири дена подоцна, премиерот Христијан Мицкоски, кој ја оркестрира и забраната за Левица, тоа го потврди – рече дека ќе има јавно-приватно партнерство за претпријатијата, вклучително и за ЈСП“, додаде Мециновиќ.
Тој истакна дека приватизацијата на Дрисла би била директен удар врз јавниот интерес, нагласувајќи дека „Дрисла треба да се унапреди, а не да се приватизира“. Мециновиќ предупреди дека ваквите мерки за забрана на политичко рекламирање се сериозен удар врз демократијата и наговестуваат авторитарен режим. „Ние можеби сме навикнати на распаднат концепт на демократија, но европските партнери се вчудоневидени од ваквиот однос на власта“, рече тој.
Според него, овие потези ќе бидат забележани во извештаите на ОБСЕ и Европската комисија. „Нашите пријатели од Европскиот парламент и од Австрија беа вчудоневидени од методите што ги користи овој режим. Вакви методи на континентот не се познати од седумдесеттите години. Вакви методи на репресија! И ова е само увод во тоа што понатаму може да се случи,“ заклучи Мециновиќ.
